KALDERETANG BATANGAS

Di ba nabanggit ko na hindi kami nag-handa nung tapusan sa mga biyenan ko sa Batangas at naki-fiesta na lang kami sa mga taga roon. Sa kapatid ng asawa kong si Jolly kami naki-tanghalian ng araw nay un at nagustuhan ko talaga yung beef caldereta na handa nila.

Napansin ko lang na ibang-iba ang pagkaluto nila ng caldereta. Di katulad ng alam natin na luto na may tomato sauce ito. Yung sa kanila ay wala…pero malasa at malinamnam ang sauce.

Kaya nung mapadalaw sa bahay naming ang pamangkin ng asawa ko na si Keth, tinanong ko sa kanya ang mga sangkap sa pagluluto ng calderetang Batangas at ibinigay naman niya. Nilagyan ko na lang ng kaunting twist para ma-improve ko pa ang dish. At hindi naman ako nabigo. Masarap at malasa ang calderetang Batangas na niluto ko.


KALDERETANG BATANGAS

Mga Sangkap:
1 kilo Beef Brisket
1 small can Reno Liver Spread
2 tbsp. Lean Perins Worcestershire Sauce
½ cup Pickle Relish
1 cup grated Cheese
1 large onion chopped
1 cloves minced garlic
1 large tomato chopped
Salt and pepper to taste
½ tsp. Chili powder (Depende kung gaano kaanghang ang gusto ninyo)
½ cup Butter or Star margarine
1 tsp. Maggie magic sarap (optional)

Paraan ng pagluluto:
1. Sa isang kaserola, pakuluuan ang karne ng baka sa tubig at asin hanggang sa lumambot.
Hanguin ito…palamigin….at hiwain sa nais na laki.
2. Sa isang kawali o kaserola, igisa ang bawang, sibuyas at kamatis sa butter. Halu-haluin.
3. Ilagay ang hiniwang karne ng baka.
4. Timplahan ng asin, paminta, chili powder, pickle relish at Worcestershire sauce. Hayaang masangkutsa.
5. Lagyan ng mga 2 tasang sabaw ng pinaglagaan ng baka at hayaan ng mga 5 minuto.
6. Ilagay ang liver spread at grated cheese. Halu-haluin.
7. Tikman at i-adjust ang lasa.

Ihain habang mainit pa.

Enjoy!!!!